मुंबई – महाराष्ट्रात गेल्या काही दिवसांपासून पावसाने पुन्हा एकदा आपली दखल देण्याजोगी उपस्थिती नोंदवली असून, संपूर्ण विदर्भ, मराठवाडा आणि पश्चिम महाराष्ट्रात जोरदार पावसामुळे जनजीवन विस्कळीत झालं आहे. अनेक जिल्ह्यांत अतिवृष्टीची नोंद झाली असून, काही भागांत धरणांतून पाण्याचा मोठ्या प्रमाणावर विसर्ग सुरू करण्यात आला आहे. पावसामुळे शेतकऱ्यांना दिलासा मिळाल्याचं चित्र दिसत असलं, तरीही काही ठिकाणी अतिवृष्टीमुळे पिकांचं मोठं नुकसानही झालं आहे.
विदर्भात मुसळधार पाऊस
विदर्भातील बहुतांश जिल्ह्यांमध्ये गेल्या चार दिवसांपासून मुसळधार पावसाचा जोर कायम असून, नागपूर आणि गडचिरोलीत सतत रिमजिम सुरू आहे. पर्ल कोट नदीच्या पुराची तीव्रता थोडी कमी झाली असली तरी चार मार्ग अद्याप बंद आहेत. भंडारा आणि गोंदिया जिल्ह्यांतील काही भागांत अतिवृष्टी झाल्याची नोंद झाली असून, भंडारा जिल्ह्यात १७ मार्ग वाहतुकीसाठी बंद आहेत.
वर्धा जिल्ह्यात संततधार पावसामुळे निम्न वर्धा प्रकल्पाचे पाच दरवाजे उघडण्यात आले असून, आर्वी तालुक्यातील उमरी आणि दहेगाव गोंडी प्रकल्प पूर्ण क्षमतेने भरले आहेत. या दोन्ही प्रकल्पांमधून सांडव्यावरून पाण्याचा ओव्हरफ्लो सुरू आहे.
मराठवाडा चिंब, शेतकऱ्यांचे पिके पाण्यात
नांदेड, परभणी आणि हिंगोली जिल्ह्यांत मुसळधार पावसामुळे जनजीवन प्रभावित झाले आहे. नांदेडमधील अनेक प्रकल्प भरले असून, परभणीत सलग तिसऱ्या दिवशी पावसाचा जोर कायम राहिल्याने शेतात उभी असलेली पिके पूर्णतः पाण्यात गेली आहेत. हिंगोली जिल्ह्यातील सिद्धेश्वर धरणाच्या पाणीपातळीत एका दिवसात तब्बल १० टक्क्यांनी वाढ झाल्याने धरण सध्या ५१ टक्के भरले आहे. त्यामुळे शेतकऱ्यांमध्ये समाधानाचे वातावरण निर्माण झाले आहे.
पश्चिम महाराष्ट्रात धरणांची पाणीपातळी वाढली
पुणे जिल्ह्यातील दौंड आणि बंडगार्डन येथून विसर्ग वाढविण्यात आला आहे, ज्यामुळे सोलापूर जिल्ह्यातील उजनी धरण ९५ टक्क्यांपर्यंत भरले असून, धरणातून २६,६०० क्युसेक पाण्याचा विसर्ग सुरू आहे. प्रशासनाने नदीकाठच्या गावांना सतर्क राहण्याचे आवाहन केले आहे. पुण्यातील खडकवासला धरणसाखळीतील चारही धरणे ८७ टक्के भरली आहेत. घाटमाथ्यावर सतत पावसामुळे ही स्थिती निर्माण झाली आहे.
महाबळेश्वर आणि साताऱ्यात मुसळधार पावसामुळे धरणांच्या पाणीपातळीत लक्षणीय वाढ झाली आहे. महाबळेश्वरमध्ये २२६ मिमी, तर साताऱ्यात नवजाला १८८ मिमी पावसाची नोंद झाली आहे. कोल्हापूर आणि सांगली जिल्ह्यांत रात्रीभर पावसाचा जोर कायम राहिल्यामुळे नद्यांच्या पातळीत वाढ झाली आहे.
राज्यात यलो व ऑरेंज अलर्ट
भारतीय हवामान विभागाने कोकण, विदर्भ आणि पश्चिम महाराष्ट्रात पुढील काही दिवस मुसळधार पावसाचा इशारा दिला आहे. कोकण घाटमाथा आणि विदर्भात यलो अलर्ट, तर रायगड, पुणे आणि साताऱ्याच्या घाटमाथ्यावर ऑरेंज अलर्ट जारी करण्यात आला आहे. मुंबई, ठाणे, पालघर, रत्नागिरी आणि सिंधुदुर्ग जिल्ह्यांत आज (२७ जुलै) यलो अलर्ट देण्यात आला आहे.
नागरीकांना सतर्क राहण्याचे आवाहन, पूरजन्य स्थितीची शक्यता
गोंदिया जिल्ह्यातील चार तालुक्यांतील १७ मंडळांत अतिवृष्टीमुळे पूरजन्य परिस्थिती निर्माण झाली असून, पुजारीटोला धरणाचे आठ दरवाजे उघडण्यात आले आहेत. धरणातून ९५९० क्युसेक पाण्याचा विसर्ग सुरू आहे. वैनगंगा नदी काठच्या गावांना सतर्क राहण्याचा इशारा प्रशासनाने दिला आहे. कोयना आणि जायकवाडी धरणांतूनही पाणी सोडण्यात येणार आहे.
राज्यातील पावसाचा जोर पुढील काही दिवस कायम राहण्याचा अंदाज हवामान विभागाने वर्तवला आहे. त्यामुळे प्रशासनाने सतर्कतेचा इशारा देत, नागरिकांनी आवश्यक ती खबरदारी घेण्याचे आवाहन केले आहे. पावसामुळे काही भागांत दिलासा मिळाल्याचं चित्र असलं, तरी अतिवृष्टीमुळे काही भागांत चिंतेचे सावट निर्माण झाले आहे.
